Santu Patri allibbirtati

Santu Patri di li Pirreri
tuttu lu munnu è a li vostri peri
ma nni mia ‘un ci aviti vinutu
viniticci ora e datimi aiutu.
Santu Patri  ca nta na pirrera stavi
di lampi e di trona nun ti scantavi
ti scantavi sulu di l’ira di Diu
aiutatimi Santu patruzzu miu.
Faciti carmari stu vintazzu
picchì accussì nesciu pazzu
nun pozzu cchiù  iri a mari
e li figghiola vonnu mangiari.
Santu Patri Marsala ti ringrazia
nun tu scurdari di farinni la razia
Di stu ventu pi sempi n’allibbirtari
acussì putemu iri a piscari.
E piscannu   vopi e asineddri
a vui purtamu li cchiù beddri
E Comu signu di divuzioni
 Vi priamu cu centu orazioni. 
Totò Mirabile.